World Mental Health Day hman a ni

Nimin October 10 kha rilru hriselna chungchang inzirtirna ni, World Mental Health Day a ni a, Mizoram hmun ṭhenkhatah hman a ni. Kumina Day thupui chu ‘Access to service mental health in catastrophies and emergencies’ tih a ni.

World Mental Health Day hi Health department buatsaihin Directorate of Health & Medical Education auditorium-ah hman a ni a; Volunteers for Community Mental Health (VOLCOMH) chuan Dawrpui Multipurpose Hall-ah 'Symposium on Mental Health' an buatsaih.

Assam Rifles chuan 'Let's walk together for mental health' tih thupuia hmangin Zokhawtharah World Mental Health Day pualin kawngzawh an huaihawt a, AR mi leh sate leh tualchhung mi ṭhahnem tak an tel.

DHME Auditorium-ah Mental Health Day hmanna inkhawm hi hi Dr Robert L Khawlhring-in a kaihruai a, HME additional director Dr Zonunmawii Pachuau-in thu a sawi. IPR joint director Mina Zoliani, MJA president C Lalrambuatsaiha leh ARDSI president Vanneihtluanga ten thupui ṭhen hrang hrang an sawi a; zawhna leh chhanna hun hman a ni bawk.

Dr Zonunmawii Pachuau chuan, Mizoramah rilru lam hrisel lohna a hluar thu sawi a, "Zirlaite zingah depression rate sang leh ruihhlo hman khaw lohna hluarte bakah, social media hman nasat vanga rilru hnualte chu rilru lam hrisel lohna lan chhuah dan langsar a ni," a ti.

Dr Zonunmawii Pachuau chuan, rilru hrisel lohna hmachhawn dan turah sorkarin policy mumal a mamawh thu sawiin, "Tunah chuan rilru hriselna lama harsatna neite'n engtik hunah pawh harsatnate an thlen theihna tur National Mental Health Programme hnuaia hmalakna TELE-MANAS te, National Mental Health Programme hnuaiah vêk tlawmngai pawl thlan chhuah bikte nena thawhhona kalpui a ni," a ti a; rilrua harsatna tawkte enkawl chu thil pawimawh zel tur a nih thu a sawi.

World Mental Health Day hi kum 1992-ah World Federation for Mental Health (WFMH) chuan a hmang ṭan a; kum 1994 aṭangin rilrua harsatna leh dam lohna hrang hrang tarlanna atan thupui bik neia hman ṭhin a ni.

National Mental Health Programme hnuaiah rilrua harsatna neite chu Tele MANAS (phone) hmangin counseling neihpui ṭhin a ni a, Tele MANAS number 14416 emaw, 18008914416-ah biak theih reng a ni. NMHP hnuaiah vêk Targeted Intervention (NGO) an awm a, ARDSI, Mizoram Chapter nen thawkhoin, eng lai pawhin phone number 7005983633 leh 9366191341-ah biak theih an ni.