Zirtirtu nghet zing zawka lâk a nih theih nan hmalak MSU-in an rêl

Mizo Students’ Union (MSU) General Conference vawi 23-na, Hnahthiala neih chuan, higher secondary school leh college zirtirtu nghet zing zawka lâk a nih theih nan hmalak an rêl.

MSU General Conference-ah hian October 9, Ningani khan an president B Lalkhawngaihzuala kaihhruaiin rorel a ni a, "Higher secondary school leh college zirtirtu nghet tun aia zing zawka lak a nih theih nan hmalak ni rawh se," an ti.

Casual teacher-te dinhmun ennawn a, dinhmun ṭha zawka an awm theih nana hmalak leh Forest (Conservation) Amendment Act 2025 zir chian a, a ṭul anga hmalak an rêl bawk a; kumpuan thupui atan 'Aia upa zah leh khua leh tui ṭha nih' tih an thlang.

MSU inkhawmpui hi Ningani chawhnu khan adviser to CM Lalmuanpuia Punte, MLA leh bialtu MLA Jeje Lalpekhlua ten an hmanpui.

Lalmuanpuia Punte chuan, Mizorama zirna kalpui dan a fuh tâwk lo nia sawiin, "General line-a kal pût pût loin, kan tuina lam,p rofessional course lama kal a ṭha ber. Ram danga hna kan zawnnaah fimkhur a ngai a, kan hnathawhna tur hre chiang hmasa loa kan kal tawp ṭhin hi sim a ngai," a ti a; hnam thuthlung nghet taka vuan turin zirlaite a chah bawk.

Ropuiliani Rûna MSU General Conference hi nizan khan a ṭiak a ni.

MSU ROREL ṬHENKHAT
• Mizoram sorkar hnuaia school zawng zawngte grade system siam a nih theih nan hmalak ni rawh se.
• Mizoram Engineering College, Lunglei hi a nih ang tur taka a kal vat theih nan hmalak ni rawh se.
• Cess aṭanga Education sector-in a chan turah hian Education sector-in a vaia a chan vek theih nan hmalak ni rawh se. Education sector-in a chan tur hi School Education leh Higher & Technical Education department ten rualkhai taka an chan theih nan MSU-in hma la rawh se.
• Mizorama dan loa khaw din zawng zawng dap chhuah a, a ṭul anga hmalak ni rawh se.