KHAWTHLIR

PYD-in thisen pe

UPC (NEI) ṭhalai pawl, Aizawl City PYD chuan nimin khan thisen pek an huaihawt a, ZMCH blood bank tan thisen unit 87 an pe a, petute mipa 71 leh hmeichhia 16 an ni.

LAD inkhawmpui

UPC (NEI) nu ho inkhawmpui lian, Ladies Auxiliary Department (LAD) General Conference vawi 47-na chu nizan khan Lunglei Farm Venga UPC Multipurpose Centre-ah ṭan a ni a, vawiinah rorel a ni ang a, nakzanah a ṭiak ang. Nimin chawhnu dar 2 vel thleng khan palai mi 2,000 vel an thleng tawh. Inkhawmpui hi General Pennet youtube channel-ah live-a pek chhuah a ni.

Lirthei dah phal loh

Lammual hmar lam gate leh Lammual main gate inkarah nizan aṭang khan tui luankawr thawm ṭhat hna thawh a ni a, October 17, 2025 thleng zan dar 8 aṭanga zing dar 4 inkarah hna thawh ṭhin a ni dawn. Hna thawh hun chhungin kawng sirah lirthei dah phal a nih loh thu Traffic SP Ruatsanga Ralte chuan a tarlang.

By-election atana pawimawh hrilhfiah

Mamit DC pisaah nimin khan political party hrang hrangte tan Dampa bial MLA by-election neih tura hriat tur pawimawhte inhrilhfiahna neih a ni a, bawrhsap K Laltlawmlova, distict election officer ni bawkin a hmanpui. Nomination thehlut, nomination endik, inhnuhdawh, symbol inpek, sum sneso vil, Model Code of Conduct kenkawh, permission (SUVIDHA), complaint (cVIGIL) leh IT application chungchangte inzirtir a ni.

Minister-in tlawh

Minister PC Vanlalruata chuan October 9, Ningani khan South Tuipui bial chhunga Cherhlun, Tarpho leh Khawhri te, Hrangturzo biala Lungkawlh leh North Vanlaiphai te a tlawh a; amah hmu duhte tan interview hun a siam. Minister hian N Vanlaiphaia KVK hmun a tlawh a, an hmalakna leh hmachhawpte a sawipui a ni.