Hmeichhe naupang zirna chungchang zirho

Social Welfare, Women and Child Development (SWWCD) minister Lalrinpuii chuan nimin khan Aizawl North College conference hall-ah 'Educate the Girl Child: Break the Bondage’ tih hmanga national seminar buatsaih a hmanpui a; zirna chu intluktlanna thlentu, chhungkua leh khawtlang nun chawisangtu a nih thu a sawi.

Lalrinpuii chuan, zirhona chu hmeichhe naupangte’n zirna ṭha an dawn theihna tura pawimawh a nih thu a sawi a, "Zirna hi intluktlanna thlentu, a ṭha zawnga mi thlak danglam thei, chhungkua leh khawtlang nun chawisangtu a ni a, hmeichhe naupangte’n sikul an kai chuan ziak leh chhiar an zir bakah, nih tum mumal zawkte an lo neih theih phah a, an zirna chuan hruaitu ṭha leh thutlukna siam thiam mi ni turin a pui a ni," a ti.

Zirnain nun kawng a chawisan thu leh a thlak danglam theih thu sawiin Minister chuan, "Hmeichhiate’n an dikna chanvo hriat leh zirna ṭha an dawn hi kumtlingloa pasal nei tihtlem nan te, chhungkaw hlim din nan te, ram nuam zawk siam nante thil pawimawh hmasa berte zinga mi a ni," a ti a; zirna chung kawng engkima mihringte siam puitlingtu a nih thu a sawi.

Lalrinpuii chuan, hmeichhe naupang hnena zirna pek chu chhuan lo awm zel turte tan a pawimawh thu sawiin, "Mizoram hi India rama ziak leh chhiar thiam tamna ram kan nih rualin, a hun hmaa sikul bànsan (drop-out) an la awm nual a, hmeichhiate zingah zirna sang (higher education) leh technical training zir zawm pha lo an tam hle a ni," a ti.

Zirhona hawnnaah hian Ministry of Women & Child Development hnuaia Savitribai Phule National Institute of Women & Child Development, Regional Centre, Guwahati assistant director Kashmiri Boruah leh WCD director Zoramthangi Chhangte te pawhin thu an sawi.

Seminar hi SWWCD department bultuma Internal Quality Assurance Cell (IQAC) Research & Innovation Committee leh Aizawl North College-a Education department buatsaih a ni a; IQAC Research & Innovation Committee chairperson Dr Lalzarmawii'n kaihruaiin, mithiamte paper present 24 zirho a ni.