Aizawl District H/S Sports zawh a ni

Aizawl District Secondary School Sports 2025 chu zawh a ni a, Mamawii High School an champion. Nimin khan Lammualah a khârna hun hman a ni a, School Education director Angela Zothanpuii'n a hmanpui.

Sports-ah hian infiamna chi sarih - athletics, football (mipa), volleyball (mipa & hmeichhia), kalchhet (mipa), inhruipawh (inpawlh) inkawibah (hmeichhia) leh taekwondo (mipa & hmeichhia) hmangin zirlaite an intihsiak a; gold medal pali, silver pali leh bronze pahnih latu Mamawii H/S an champion.

Best athlete (mipa) chu Krista Ramdinthara, Springfield H/S niin, gold medal pali a la a, hmeichhia best athlete chu Sarah Lalhmingmawii, Central H/S niin, gold pathum leh bronze pakhat a la a ni.

Angela Zothanpuii chuan, Secondary School Sports chu zirlaite rilru leh taksa tana ṭha a nih thu sawiin, "Tunlaiah ruih theih thilin kan ramah hmun a khuar thûk tawh em em a, hetiang lakah hian zirlaite chu an fihlim a, taksa tana ṭha lo chu hnar ngam a ṭul," a ti a; zirna leh infiamna kai kawp thiam turin zirlaite a chah.