Khawvel el phâk zirna leh zirlai chher chhuah kan tum - Education Minister

Education minister Dr Vanlalthlana chuan, state university din turah sorkarin khawvel el phâk zirna leh zirlai chher chhuah an tum thu a sawi a; zirtirtu laknaah lehkha thiam ringawt ni lo, zirlaite zirtir thiam an zawn thu a sawi bawk.

October 10, 2025 zana Hnahthiala MSU General Conference khârna inkhawmah Dr Vanlalthlana chuan, zirna kalphung chu thâwk leh khata thlak thut theih thil ni lo mah se, zawi muangin a ṭha zawngin danglamna an siam mek niin a sawi a, "Sorkar laipuiin a rawn ngiat angin state university pangngai tak, Mizorama college zawng zawng rawn in affiliate-na tur duan kan tum mek a, chuta zir tur course-te pawh thlan tawh niin, khawvel el phak zirna leh zirlai chher chhuah kan tum a ni," a ti.

Dr Vanlalthlana chuan, lehkhathiam tak takte'n an chanvo tur an chang lo ṭhin chu a tawrhpui thu sawiin, "Zirtirtu hna lakah pawh fair takin, advertisement tel ngeiin qualify leh thiam tak tak chauh kan la tawh a, zirtirtu lak turte pawh lehkha thiam ringawt ni lo, zirlaite zirtir thiam an nih ngei theih nan an exam-naah practical teaching kan ti tel zel tawh," a ti a; dan ang leh dik takin Samagra Shiksha hnuaiah zirtirtu, instructor leh a dang atan mi 1,700 chuang leh casual teacher 1,400 chuang an lak tawh thu a sawi.

College zirtirtu tur 32 la turin an inbuatsaih mek thu sawiin Vanlalthlana chuan, "Lungleia Engineering College lo sak tawh, hman tlak loha dah chu nakkum academic session-a hman theih turin ṭan kan la a, chutah pawh chuan thawktu tur post siam vek tawh niin, thawktu lak theih turin ruahmanna siam a ni tawh," a ti.

Education Minister hian zirlaite chu nuam an tih chin bakah risk la ngam tur leh, thil tihna reng rengah kalsan neih a ngai ṭhin tih hre turin a chah bawk.

Inkhawmah hian bialtu MLA Jeje Lalpekhlua pawhin thu a sawi a, rinawmna, tumruhna, hawihhâwmna leh Zo nun zemawi chhawm nung zel turin zirlai kal khawmte a ngen a ni.