PM-in PM-DDKY leh Pulses scheme tlangzarh
Prime minister Narendra Modi chuan October 11, Inrinni khan New Delhi-a National Agricultural Science (NASC) Complex, PUSA-ah India rama kut hnathawktute chhawmdawlna tur scheme thar pahnih - Pradhan Mantri Dhan Dhaanya Krishi Yojana (PM-DDKY) leh Mission for Atmanirbharta in Pulses scheme a tlangzarh. PM-DDKY hi Mamit district-ah kalpui a ni dawn.
Prime Minister-in loneitute tana scheme thar pahnih a tlangzarh hi India rama loneitute'n thlai tam zawk an thar a, agriculture-a intodelhna atana hmasawnna thlen thei tura ruahman an ni. PM-DDKY hi India ram state hrang hranga district 100-ah kalpui tur a ni a, kalpuina tur zingah Mamit district a tel.
PM Narendra Modi hian Agriculture Infrastructure Fund hnuaia cheng vbc 5,450 sênga siam project hrang hrang 1,034 a hawng bawk a ni.
New Delhi-a scheme thar tlangzarhnaah hian Mamit district aṭangin Agriculture department officer pakhat, Mamit KVK subject matter specialist pakhat, National Mission on Natural Farming Scheme hnuaia natural farmer pakhat leh farmer producer company aiawh pakhat an tel. Aizawl aṭangin Agriculture secretary Ramdinliani hoin Agriculture & Farmers’ Welfare department leh Horticulture department hotute bakah, Siaha, Kolasib leh Hnahthial KVK hotute leh loneitute'n live telecast-in an chhim.
PM-DDKY
☑ Kum 6 chhung kalpui tura ruahman a ni a, sorkar laipui chuan cheng vbc 24,000 a ruahman.
☑ India rama district 100-ah kalpui tur a ni a, Mizoramah chuan Mamit district-ah kalpui a ni dawn.
☑ Scheme kalpuina turin sorkar laipuia ministry 11 hnuaia scheme 36-te kaih kawp (convergence)-a tur a ni.
☑ India rama loneitu mi nuai 170 huap thei tura ruahman a ni.
MISSION FOR ATMANIRBHARTA IN PULSES
☑ Ram puma kalpui tur a ni a, sorkar laipuiin cheng vbc 11,440 a ruahman.
☑ India rama bê (pulses) chíngtu loneitute'n hmasawnna an neih theih nan hmalak a ni dawn.
☑ Loneitute'n bê chi ṭha zawk an chìn a, tam zawk an thar theihna tur te, bê chînna hmun zauh leh value-addition lama hmasawnnate kalpui tum a ni.