LAD General Conference a ṭiak; Ruihhlo dona leh invenna kawnga hmalak an rel

UPC (NEI) nu pawl, Ladies Auxiliary Department (LAD) inkhawmpui lian, General Conference vawi 47-na, Lunglei Farm Venga UPC Multipurpose Centre-a neih chuan ruihhlo dona leh ruihhlo laka invennaah hmalak an rêl.

LAD General Conference-ah hian thupui chu 'I ram lo thleng rawh se' tih a ni a, nizan khan a ṭiak.

Inrinni khan nilêngin rorel palai 1,300-in ro an rêl a; ruihhlo dona leh invenna kawnga hmalak an rêl bakah, kum 2027 General Conference thupui atan 'Kan fate i chhanhim ang u,' tih an thlang.

Inkhawmpui report-a tarlan danin, UPC (NEI) LAD-ah hian member 23,370 an awm mek a, tualchhung kohhran 144-ah LAD din niin, zûk leh hmuam nghei member 4,295 an awm a ni.