Solid Waste Management System tlawh

Adviser to CM Dr Lorrain Lalpekliana Chinzah, Lawngtlai East bialtu MLA chuan October 11, Inrinni khan Lawngtlai Solid Waste Management System (SWMS) a tlawh. SWMS hi UDPA department hnuaiah October 2024 aṭanga sak ṭan niin, kum hnih chhunga zawh tur a ni a; Rs 6,97,70,000 ruahman a ni.

Dr Lorrain Lalpekliana Chinzah chuan, Lawngtlai khawpuiin bawlhhlawh sâwngbâwlna ṭha tak a neih tur chu peih a nih hunah khawpuiin faina leh thianghlimna lamah nasa takin hma a sawn phah dawn thu a sawi a, "Mipuite'n an mamawhna hriain chak leh ṭha taka thawh bakah, a hun taka zawh a ṭul a, ṭha, rintlak leh hun tiam chhunga zawh a nih theih nan contractor-te'n theihtawp an chhuah a ṭul," a ti.

Lawngtlai bawrhsap Donny Lalruatsanga chuan, chak leh ṭha taka hna thawh a nih theih nan theihtawp chhhuah a ṭul thu leh, hnathawh mekte endik reng a ni a, uluk taka endik zui zel a nih tur thu a sawi.

Lawngtlai Solid Waste Management System-ah hian wet waste composting centre (ṭawih theih paihna), dry waste composting centre (ṭawih thei lo paihna), site office cum staff quarter, sanitary landfill leh a dangte a awm dawn. A hmun hi KMMTP kawngpui Phaikhang-mualah a ni a, contractor chu Lalfamkima, Aizawl a ni.