Poshan Maah Cycle Rally buatsaih

Rashtriya Poshan Maah (National Nutrition Month) hman mek pualin October 11, Inrinni zing khan Aizawlah Cycle Rally buatsaih a ni a; Vanapa Hall kawt aṭangin Aizawl DPO Lalrammawii Kawilam-in a vailiam a, Ṭhuampuia AMC office thleng an tlan.

Poshan Maah Cycle Rally hi Women & Child Development department-a Aizawl District Programme Officer, CDPO Aizawl Urban ICDS Project leh Mizoram Cycling Association te ṭanghoin 'Men-streaming programme' puala an buatsaih a ni. Chhungkaw enkawlnaa pate leh mipate mawhphurhna te, hriselna tura ei leh in ṭha pawimawhna te, naupang ṭhanlenna kawnga pa berin hma a hruai a pawimawhnate inzirtir a ni.

Cycle Rally-a telte hian nupui fanaute hrisel tura enkawl kawnga chhungkaw pa mawhphurhna te, chhungkaw nuam leh chhungkaw hlim siam tura pa ber pawimawhna te, taksa tana hrisel lo ei lo tur leh lei lo tura intiamna thu an sawi rual bawk.