Lammuala international expo-ah ILP vangin hnam dang 36 man

Mizo Zirlai Pawl (MZP) leh Mizoram Merchant Association (MIMA) chuan October 10, Zirtawpni khan Lammuala neih mek 1st International Star Expo-ah hnam dang sumdawngte'n inner line permit (ILP) an neih leh neih loh an endik a; ILP nei lo leh thi tawh mi 36 manin, thuneitute hnenah an hlan.

MZP leh MIMA chuan, Expo-a hnam dang rawn sumdawng zingah mi 20 chuang mi pakhatin a sponsor thei leh sponsor-tu Zorun Events neitu Laldingngheti Pautu, Lunglei-in a sponsor-te a ngaihtuah zui miah lo niin an tarlang a, "Hriatthiam har kan ti. Hetiang hi kan ramah a thlen nawn tawh loh nan a rang lama chhui chiang tur leh Inner Line Regulation bawhpelha mi pakhatin heti zat hnam dang a sponsor chungchangah action la ngei turin thuneitute kan phût," an ti.

Mizoram Gazette-a tihchhuah, Notification Guidelines for the Enforcement of the Inner Line Regulation in Mizoram-ah mi pakhatin ILP 10 aia tam a sponsor theih loh thu a inziak nia sawiin MZP leh MIMA chuan, "Mi pakhatin mi 20 chuang a sponsor leh si hi ILP kan kal pui dan mumal loh vang leh thuneitute inthlahdah vang a ni," an ti a; ILP pek chhuah kawngah pawh fimkhur lehzual turin MZP leh MIMA chuan thuneitute an ngen.

MZP leh MIMA tarlan danin, he expo-a pawn lama ei siamtute'n Food Safety & Standards Authority of India license an neih hi Assam hnuai niin, kum 2020 a expired tawh a ni. An thil siamte hi a tuihnai lo hle a, hriselna atan pawh a him tawk lo.

Chimral kan nih loh na tura Mizoram a hnamdang lo lutte khuahkhirhna dan khauh tak kan neih hi mimal hlawkna um vang ringawta pal zam a nih tawh loh an duhthu tarlangin MZP leh MIMA chuan, " Mizoramah hetiang sumdawng thei lo hnamdang, inthurualpuia sumdawnna kal pui hi awm tawh lo se. He expo neih mek pawh enzui a, action la nghal turin thuneitute kan ngen a ni," a ti.