Police post ruak tam lutuk Tihziaawm tum a ni - HM

Home minister K Sapdanga chuan police post ruak tam lutuk tihziaawmna turin Home department an inbuatsaih mek thu a sawi.

Nimina Serchhip ZPM hruaitute nen an pisa-a an inkhawmnaah Home Minister chuan, "Mizoram Police-ah hian tun dinhmunah post ruak 3,647 a awm mek a, kum tin hian thihna avang leh pension avangtein post ruak 200 chuang a awm zel ang a ni. Police indaih lohna a nasa em em a, kalpaha inlak ngawt theih a ni lo a, chhungte boral tawh ai pawh lak ngawt theih a ni tawh lo," a ti.

Dan ang taka thil tih a ngai tawh tih sawiin K Sapdanga chuan, "Kum 2021 aṭang vel khan court leh constitution a thikthu a chhe riau. Sorkar hmasate kha dan khaikhup san chungchangah keini aiin an lo ngam hret. Sorkar liamta pawh kha an hun hnuhnung lamah chuan an fimkhur tawh hle," a ti a, police post ruak tam lutuk tihziaawmna turin Home dept. a inbuatsaih leh mek thu a sawi.

Home Minister chuan DPAR leh Law department-ahte dilna thehluh a ni leh dawn tih sawiin, "Police lak hnuhnung berah khan post 1,100 kan dil a, DPAR leh Law department lamin mi 250 min phalsak thung. Police Headquarters aṭangin survey kan nei mek a, district tina police indaih loh dan report lakkhawm mek a ni," a ti.

Home Minister chuan hmun hrang hranga police quarters-te pawh an awngrawp tawh hle tih sawiin, "Hei pawh hi a chhiat dan leh tihzui dan tur November-ah report kim theih beisei a ni a, thuamṭhat tum a ni. Mizo Territorial Army din tur pawh thla tharah advertisement chhuah tum a ni. A tirah mi 75 lak tura tih niin, kan hotuten an dil belh," a ti a, mi 150 lak phalsak an nih tawh thu a sawi.

Serchhip ZPM hruaitute'n khawtlang hmasawnna tur mamawh hrang hrang an lo thlente chu a theih ang anga bawhzui a tum thu Home Minister hian a sawi bawk.