Bana Kaih Phase-I hnuaiah bank-ten loan cheng vbc 144.16 an pe tawh

Mizoram State Policy Coordination Committee (MSPCC) chu nimin khan an vice chairman Dr KC Lalmalsawmzauva kaihhruaiin Planning committee room-ah an ṭhukhawm a; Bana Kaih Scheme Phase-I hnuaiah bank-ten mi 201 hnenah loan cheng vbc 144.16 an pek tawh thu tarlan a ni.

Ṭhukhawmah hian Bana Kaih Scheme Phase-I loan component aṭanga loan pek chhuah dan thlirho niin, phase-I hnuaia DPR approve ngai tlem la awmte an thlirho nghal a; loan dilna lut zawng zawng 11,439 aṭangin dilna 702 pawm a nih thu leh dilna pawm zinga 201-in loan an lak tawh thu tarlan a ni.

Bana Kaih Scheme hnuaia bank thawhpui (partner bank) zingah Mizoram Rural Bank-in mi 152 hnenah loan pe tawhin, buaipui mek (pending) 176 an nei. State Bank of India-in loan pek tawh 40 leh pending 84 an nei a; Mizoram Cooperative Apex Bank-in mi 17 hnenah loan pein, pending 25 an la nei.

Bank-ten Bana Kaih Scheme Phase-I loan component atana loan an pek chhuah zawng zawng hi Rs 14,41,60,600 a tling tawh a; phase-I hnuaia CM Special Package-ah dilna lut 29,571 zinga 2,258 pawm niin, Rs 18,33,58,370 pek an ni.

Handholding Scheme Phase-II dilna hawn mek a nih thu leh nimin thleng khan loan component-ah dilna 132 leh CM Special Package dilna 22,365 a luh tawh thu tarlan a ni bawk.