India rama damdawi-in ṭha zingah Sialsuk PHC leh Suangpuilawn PHC
India rama sorkar damdawi-in ṭha bik tehna National Quality Assurance Standards (NQAS)-ah Mizorama primary health centre pahnih - Sialsuk PHC leh Suangpuilawn PHC-te an tling thar. Heti hian Mizorama sorkar damdawi-in 49-in NQAS national certificate an nei tawh a, PHC pathumin result an nghak mek.
National Health Mission, Mizoram chuan India rama sorkar damdawi-in ṭha bik tehnaah Sialsuk PHC leh Suangpuilawn PHC te an tling thar tih a tarlang a; Sialsuk PHC hian tehnaah 90.06% leh Suangpuilawn PHC hian 93.14% an hmu a ni. Heng PHC pahnih nen hian Mizorama sorkar damdawi-in 49 chuan NQAS national certificate an nei tawh a, sorkar damdawi-in 18 leh HWC sub-centre 21-in state level certificate nei mekin, national certificate result nghak mek PHC pathum an awm bawk a ni.
NQAS certified damdawi-inte hi endikna chhâwng thum paltlang an ni a, a tawp bera endikna an hmachhawn hi National External Assessment tih niin, Mizoram pawn aṭangin endiktu (assessor) an lo kal ṭhin. Endiknaah hian 70% an hmuh chuan certified an ni chauh ṭhin a; damdawi-inte hi natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi-in faina leh dik taka damdawi-in bawlhhlawh sawngbawl te, hawihawmna leh a chhehvel vawnfai kawngah leh, environment vawnṭhat kawngahte endik an ni.
Health minister Lalrinpuii chuan India rama damdawi-in ṭha tehnaa tling thei tura thawktute fakin, "Heng NQAS certified sorkar damdawi-in 49 kan neih tâkte hi mipuite’n ṭangkai taka an hman ka duh a, ṭangkai taka hmang turin ka chah a ni," a ti.