Vawk leh ui khapna thupek chhuah

Serchhip district bawrhsap Paul L Khuma chuan thuchhuah siamin, Serchhip district-ah vawk leh vawksa aṭanga ei tur siam lakluh leh, faina leh hriselna lama hmasawn nan Serchhip district-ah ui chhuah zalen khap a nih thu a tarlang.

Paul L Khuma chuan, district ṭhenkhatah vawk pùl hri, African Swine Fever (ASF) vangin vawk tam tak a thih thu leh vawk eng emaw zat suat a nih tawh thu a tarlang a, "Serchhip district chhunga kan ran vulhte an lo him zel theih nan Bharatiya Nagarik Suraksha Sanhita, 2023 Section 163 tlawhchhanin thupek hi chhuah a ni a; Serchhip district-ah ramdang (foreign), state dang leh district dang aṭangin vawk, vawksa leh vawksa aṭanga siam eitur reng reng lakluh khap tlat a ni," a ti.

Serchhip district chhung khua leh khua inkara vawk inlakpawh turte chu AH&Vety department-a thawkte emaw, khawtlang hruaitu (VC)-te hnen aṭangin ran hrisel ngei a ni tih hriatpuina la turin Bawrhsap chuan a hriattir a; vawk hrisel ṭha chauh talh tur te, vawk damlo leh thite AH&Vety department-a thawktute hnenah hriattir vat tur leh vawk thite chu uluk takin disinfectant (chinai) nen leiah thûk taka phumbo turtein a hriattir bawk.

Paul L Khuma chuan India ram chhung leh Mizoram chhungah faina leh hriselna lama hmasawn turin sorkarin chak taka hma a lak thu a tarlang a, "Serchhip district chhungah pawh mipuite'n faina leh hraselna lama hma kan lo sawn zel theih nan theihtawpa hmalakna a ni a, hetihlai hian ui khuahkhirh lohte khawlaia chhuah tir ṭhin hian khawtlang faina, himna leh hriselna a nghawng theih bakah, khawtlang hmasawnna leh changkanna daltu a ni thei," a ti a; BNSS, 2023 Section 163 tlawhchhanin ui khuahkhirhna thupek tihchhuah a nih thu a tarlang.

Ui khuahkhirhna

* Mi tumahin midangte tana harsatna siam zawng leh midangte tana hnawksakin ui an vulh tur a ni lo.

* Ui vulhtuten khawlaiah ui an chhuah zalen tur a ni lo a, khawlaia an chhuahpui dawnin hrui/chain rinawm ṭha taka hlingin an kai ngei tur a ni.

* Ui vulhtuten an an ui vulhte ṭha takin an khuahkhirh tur a ni.

* Khawlaia ui chhuak leh a nghawnga hrui/chain a thlunna awm lote chu neitu awm lo anga ngaih a ni ang.

* Ui vulhtuten an ui vulhte zun leh ek khawlaiah an hnutchhiah tur a ni lo.