MIMA-in expo titawp turin an ngen

Mizoram Merchant Association (MIMA) chuan nimin khan 1st International Star Expo titawp tura ngenna Aizawl DC leh Aizawl Police Station-ah an thehlut.

MIMA hian nimin zing khan an pisaah emergency meeting koin, 1st International Star Expo neih mek chungchang an sawiho a; expo-ah a buatsaihtute hian dan leh hrai an ngaipawimawh lo a, advertisement an tar angin an kalpui lo hle niin an hria.

Dan bawhchhiaa expo buatsaih tih tawp a la nih loh avangin MIMA leh MZP te chuan an ngaithiam lo hle tih tarlangin MIMA chuan, "Heti chunga he expo hi hawn zel a nih a, buaina emaw, harsatna emaw an tawk a nih pawhin MIMA leh MZP chuan mawh an phur lo ang," an ti.

MIMA tarlante :

* Central Consumer Protection Act 2019 Section 89-in a sawi angin he expo hian advertisement-ah leh banner-a an tar angin '1st International Star Expo' tiin tar a ni a, hei hian Central Consumer Act 2019, Section 89 bawhchhiain misleading/false advertisement a ni. Hei hi danin hremna a phut chuan nuai tam tak chawi leh kum tam tak jail tan theihna a ni.

* Food Safety Licence nei loin 'Delhi Kitchen' tih hmangin ei leh in siam a ni. He license hi ni 20.02.2021 a thi tawh niin, kum 4 lai a thi tawh. Hei pawh hi FSSAI dan kalh tlat a ni.

* ILP an neih dan MZP leh MIMA-ten October 10, 2025 khan he expo-a awmte an endik a, invalid ILP nei mi 36 man an ni a, police-ah pek an ni.