KHAWTHLIR

Thisen pe

NSS ICFAI University Mizoram Unit leh Red Ribbon Club ṭangkawp chuan nimin khan NJY Auditorium, ICFAI-ah thisen pek runpui an buatsaih a; Civil Hospital, Aizawl blood bank tan mipa 58 leh hmeichhia 10-ten thisen unit 68 an pe.

Training hawng

Planning secretary Lalmalsawma Pachuau chuan nimin khan Royal Lalawi Hotel-ah ni li awh tur 'Orientation Training Programme for Officers of Directorate of Economics & Statistics' a hawng. Training-ah hian gross state domestic product (GSDP) base year thar lo awm tura inpuahchahna leh district domestic product, capital formation, price statistics leh ASUSE survey chungchangte zirho a ni ang.

e-SHRAM

Siaha District Labour and Employment office leh District Information and Public Relations office ṭangkawp chuan nimin khan DIPRO conference hall-ah sorkar hna nghet nei lo leh mahni kutkea eizawng (unorganised worker)-te tan e-SHRAM a inziahluh runpui an buatsaih. e-SHRAM hi Ministry of Labour & Employment hmalakna niin, unorganised worker-te hamṭhatna tura buatsaih a ni a; e-shram hnuaia inziaklutte hi PMSBY hnuaiah thun fel nghal an ni.

Hming la pe lo

Dampa bial MLA by-election November 11, 2025-a neih tura returning officer Malsawmzuala tarlan danin, nimin tlai dar 3 thleng khan inthlan chuh tura hming pe lut an la awm lo. Inthlan chuh tumte tan October 21, 2025 thleng hming pek luh theih a ni.

DC-in khap

Lawngtlai district magistrate Donny Lalruatsanga chuan Ṭhingtàm avangin Lawngtlai district-ah sazu a puan nasat thu leh tûr hmangin sazu hraia hmalak a nih thu a tarlang a; mipui him nan Lawngtlai khawpuiah sazu/chepa leh sava lam chi sa/sa rep bakah a thi leh dam pawh ni se zawrh khap a nih thu leh, district dang aṭang lakluh emaw, thawnchhuah emaw khap a nih thu a tarlang.