CM-in changél káwr sawngbawlna a hawng

North East Centre for Technology Application and Reach (NECTAR)-in Serchhip Zuangleng rama changél káwr sawngbawlna Common Facility Centre (NECTAR Livelihood Improvement Project – A Value Chain on Utilization of Banana Pseudostem for Value-Added Products) an din thar chu nimin khan chief minister Lalduhoma'n a hawng.

CFC hi changél káwr aṭanga hrui siamna, kuta siam paper siamna, vermicompost siamna leh savun thlâkna (vegan leather) siam theihna tura duan ni a; Ministry of DoNER hnuaia PM-DevINE sum hmanga din a ni.

Chief Minister chuan, Zuangleng ram leh a chhehvelah changél a tam thu leh, Khumtung leh a chhehvel khuaah balhla chingtu tam tak an awm thu a sawi a, "Hengte behchhan hian NECTAR-te'n changél káwr sawngbawlna an din a, he laia ram nei, changél leh balhla káwr paih mai mai ṭhinte'n sumah an chantir thei dawn ta a ni," a ti.

DoNER chungah a lawm thu sawiin Lalduhoma chuan, "He unit enkawltu tura thlan implementing agency APRINS te ṭha taka kalpui turin kan beisei dawn a, kan tum ang ngeia kan kut hnathawktute tana ṭangkai taka an kalpui kan duh," a ti a; hnathawktu NECTAR hmalaknaah an lawm thu a sawi.

Agriculture minister PC Vanlalruata pawhin thu sawiin, "Mizoramin kan la hmelhriat ngai vak loh, changél káwr sawngbawlna Serchhip district-in kan nei hi ka lawm a, mi tam takin an ṭangkaipui ngei ka ring," a ti.

Changél káwr sawngbawlna buaipuitu NECTAR hi Department of Science & Technology hnuaia autonomous institution a ni a, Zuangleng CFC enkawl turin APRINS, Guwahati thlan a ni.