Zirtirtu siamremna turah insawipui leh nawrna a awm ṭhin - Dr Mathlana

Education minister Dr Vanlal-thlana chuan, zirtirtu indaih lohna siamrem tura hmalaknaah mi lian leh thil ti thei zawkte puna insawipui leh nawrna te a awm ṭhin thu a sawi a; sorkarin huaisen taka hma a lak zel dawn thu sawiin, mipui hriatthiamna leh ṭawiawmna a ngen.

Minister hian nimin khan Mizoram Hindi Training Col-lege (MHTC)-in an audito-rium-a golden jubilee an lawm a hmanpuinaah thu sawiin, "Thingtlang lamah zirna tihhmasawn a ngai hle a, zirtirtu indaih lohna awm ṭhinte tihrêm a nih theih nan sorkarin hma a la reng. Aizawla zirtirtu inbengberek nasa lutuk leh thingtlang lama zirtirtu indaih lohna nasa takte siamrem tura hmalakna kal mekah zirtirtu ṭhenkhat hnen aṭangin mi lian leh thil tithei zawkte pun a, insawn lo tura insawipui leh nawrnate a awm ṭhin," a ti.

Dr Vanlalthlana chuan, insawipuitir ang chi chu ti tawh lo turin zirtirtute chahin, "Ram leh hnam tana ṭha thei ang ber turin sorkar chuan huaisen takin hma a la zel dawn," a ti a; zirtirtu sem rual tura sorkar hmalakna turah mipui hriatthiamna leh ṭawiawmna a ngen a ni.

India ram dai dar tur leh eizawnna leh hna hrang hrangte thawka thei turin Hindi thiam a pawimawh thu sawiin Vanlalthlana chuan, "MHTC-in kum 50 in tling hi ka lawmpui tak zet," a ti a; awmze nei lehzuala Hindi zirna kalpui tur leh, zirlaite'n ziak leh chhiar mai ni lo, ṭawng an thiam tak tak theih nan ṭang lehzual turin thawktute a chah.

MHTC jubilee lawmnaah hian Education Minister hian Hindi-a ziah lehkhabu 15,000 chuang awmna leh tunlai thiamna hmanga thuam 'New Age Learning Centre and Fully Automated Library' a hawng a; MHTC principal Dr Judy Lalengvari pawhin thu a sawi a, thawktu pension tawhte chawimawina hlan a ni bawk.

MHTC hi kum 1975 khan Mizoram sorkar leh Central Institute of Hindi, Agra ṭang dunin an din a; India hmarchhaka Hindi medium-a zirtirtu training-na hmun awm chhun niin, National Council for Teachers Education (NCTE) pawmpui a ni. Hindi Parangat (BEd), Hindi Praveen (D.El.Ed) leh Hindi Kaushal zirnate awmin, zirlai 100 vel an awm mek.