Thla 5 chhungin Palliative Care hnuaiah damlo 1,586 an in lamah enkawl an ni

Damlo na zualte enkawlna, National Programme for Palliative Care (NPPC) hnuaiah sorkar kum kal mek 2025-26 chhunga thla nga, April-August chhungin in lamah damlo 1,586 enkawl an ni a, OPD-ah mi 5,006 enkawl an ni.

October 13, 2025-a World Hospice & Palliative Care Day hmannaa tarlan danin, NPPC hnuaiah April-August, 2025 chhungin damlo an in lama en zat mi 1,586 an ni a, in lama damlo lo enkawltu mi 333 hnenah damlo enkawl dan zirtir a ni. NPPC hnuaiah hian OPD-ah damlo 5,006 en niin, mi 1,048 chu damdawi-inah dah luh (admit) an ni a; phai lam leh Mizoram State Cancer Institute-a thawn (refer) mi 63 an awm bawk.

Palliative Care hi natna vanga thih hlauhawma awm mekte leh an chhungte’n nuam leh hahdam zawka an hman theih nana an natna tawrh chhâwk zângkhaina tura enkawlna a ni a; an natna enkawlna damdawi hmanga enkawl mai theih tawh lohte’n na hrehawm an tawrh lohna tur leh an rilru hahna chhâwk zângkhai thei tura ruahman a ni.

Damlo mahni ina inenkawlte chu Health department lam mite'n an tlawh chángin inenkawlna atana mamawh - IV fluid, venflon, dressing hmanrua, damdawi, catheter, ryles tube, sterile glove leh ṭul dang te, damlo ei tur Sorazo, bawnghnute, artui, thei, Hermin, Lipofundin leh a dangte an kensak ṭhin.

NPPC hi October 2016 aṭangin Mizoramah hman a ni a, Directorate of Hospital & Medical Education-ah State Palliative Care Cell din a ni. Health department-in district a neih mek pakua - Aizawl East, Aizawl West, Lunglei, Siaha, Champhai, Kolasib, Serchhip, Lawngtlai leh Mamit district-ahte hman mek a ni a, Saitual, Khawzawl leh Hnahthialah te NPPC kalpui zel tum a ni bawk.

World Hospice & Palliative Care Day hi khawvelah kum 2005 khan hman ṭan a ni a, Mizoramah chuan kum 2017-ah hman ṭan a ni. Kumina Day chu DHME Auditorium-ah hman a ni a, HME director Dr SR Ngurchamliana khuallian a ni.