Transport Minister-in DTO pisa a hawng

Transport minister Vanlalhlana chuan nimin khan Saitual District Transport Officer (DTO) pisa a hawng a; October 14, Thawhlehni khan Khawzawl DTO pisa a hawng tawh bawk. Minister chuan, rui chunga lirthei khalh loh tur a nih thu leh lirthei khalhtute an fimkhur a ngaih thu a sawi.

Saitual DTO pisa a hawnnaah Vanlalhlana chuan lirthei khalhtute inthlahdah avangin thihna a thlen theih bakah ramtuileiloa awm theihna a nih thu a sawi a, "Lirthei khalhtute kan fimkhur a ngai a, driving license nei turin test kan paltlang vek tur a ni. Kan himna bakah passenger-te himna leh lirthei dangte bakah, kawng sira mihring kalte himna hi kan kutah a awm tih kan hre tur a ni a, ruih theih thil ti chungin lirthei kan khalh tur a ni lo," a ti.

Vanlalhlana chuan, Mizorama department eng emaw zat zingah Transport department chu sum thawk chhuak ṭhin department tlemtê zinga mi a nih thu sawiin, "DTO office kan hawn hian hmasawnna a thlen ka beisei. A hun taka lirthei chhiah pek te, pollution certificate endik te, danin a phal bungrua phurhte ngun zawk leh uluk zawkin thawktute'n an vil thei tawh dawn. Mipuiin thawktute thu kan zawm a, kan ṭanpui a pawimawh," a ti a; chhiah pekte chu mipuia let leh tur a nih avangin thuawih taka chhiah pek a pawimawh thu a sawi.

Transport Minister chuan, DTO pisa thar chu mipui tana harsatna siamtu leh phurrit ni loin, lirtheite felfai leh rang zawka ziah luh nan leh mipui tana remchanna tur a nih thu a sawi a, "Dan hi keimahni ṭhatna atana siam a ni a, ṭha taka zawm hi kan mawhphurna a ni. DTO office thar hawn hian Saitual district-ah hmasawnna thar a thlen ka beisei," a ti a; DTO pisaa thawkte chu ṭhahnemngai taka thawk turin a chah.

Khawzawl DTO pisa a hawnnaah Vanlalhlana chuan, "Kalphung thar sorkar chuan kan district neihte hi fûke kima hna thawhtir kan tum a ni," a ti bawk.

Bialtu MLA Prof. Lalnilawma, minister of state chuan, Saitual DTO office hawn chu inthlan campaign laia an auhla zinga mi a nih thu sawiin, "Vawiinah a hlawhtlinna kan hmu. Office thar hian awlsamna tam tak min pe dawn a, thâ leh hun bakah, sum tam tak kan save thei dawn a ni," a ti.

Prof. Lalnilawma chuan, "Kan sarkar hmasate'n politics-ah zei takin min lo kaihruai a, min thlenpui chin kan hria a, keini chu kan zei lo a, development-ah erawh chuan kan zei viauin ka hria," a ti a; a bialah theihtawp a chhuah thu a sawi.

Saitual DTO pisa hawnnaah hian Lok Sabha MP Richard Van-lalhmangaiha'n thu a sawi bawk.