Kawng chhia vangin gas thleng ṭha lo - MIDA

Mizoram Indane Distributors' Association (MIDA) chuan thuchhuah siamin, Sairang-Kawnpui kawng NH-306 chhia vangin gas phur truck-te'n harsatna an tawh ṭhin thu leh, mipuiah gas indaih lohna a thlen mek thu an tarlang a; NH-306 kawngpui chu siamṭha vat turin sorkar an ngen.

MIDA chuan, kumin June thla aṭangin Mizoramah eirawngbawlna gas a thleng ṭha lo tih a tarlang a, "NH-306 huam chhung Sairang leh Kawnpui inkar kawng a chhiat vang a ni a, kawngpui hian ṭhat lam aiin chhiat lam a la pan zel. Tun dinhmunah LPG truck-te hi ni 4/5-te kawngah an thang ṭhin a, kawng laka an thang rei avangin LPG bottling plant lamah truck indaih lohna a thleng nasa," an ti.

Gas bottling plant-in load pek duh mah se, kawng lakah truck an thang rei ṭhin avangin gas phur tur truck an awm loh châng a tam thu tarlangin MIDA chuan, "Tunah hian mipuiah gas indaih lohna leh harsatna a thleng chho mek," an ti a; harsatnate chu thuneitute hnenah an thlen tawh chungin, ngaihsak a hlawh lo a, hmasawnna a awm lo hle tih an tarlang.

MIDA chuan, kawng a ṭhat loh reng chuan hunpui lo thleng turah gas hnianghnâr a awm an beisei loh thu tarlangin, "Mipuite hriatthiamna kan ngen rualin, kan sorkar hi kawngpui siamṭha vat turin kan ngen a ni," an ti.