KHAWTHLIR

Thisen pe

Champhaia Gandhi Memorial Higher Secondary School NSS volunteer-te chuan nimin khan Champhai District Hospital-ah thisen unit 70 an pe a, petute mipa 62 leh hmeichhia pariat an ni. Lunglei Auto Rickshaw Owners Association pawhin nimin khan Farm Veng community hall-ah Lunglei Civil Hospital tan thisen unit 19 an pe bawk.

VUC-in thu tiamtir

Dampa by-election-a ZPM candidate Vanlalsailova chu nimin khan ZPM pisaah Val Upa Council (VUC)-in thutiam an chhamtir. He hun hi VUC vice chairman Rin Sanga'n a kaihruai a, VUC member Maj. Thanruma'n ṭawngṭaisakin, VUC member Dr Vanlalhluna'n fuihna thu a sawi. VUC hian ZPM candidate chu dan zâwm chunga theihtawpa campaign tur te, thlan tlin a nih pawhin ram Danpui hnuaiah Pathian ṭihna nen ram leh hnam rawngbawl tura inbuatsaih turin an fuih a ni.

Minister-in enfiah

PWD minister Vanlalhlana chuan nimin khan Saituala PWD-in an sak mek Saitual DC Bangla, Circuit House leh District Hospital OPD building-te tlawhin a enfiah. Hna ṭha taka thawk tur leh a hun taka zawh tum turin hna thawktute a hrilh a ni.

Hmalakna thlirho

Aizawl district Nasha Mukt Bharat Abhiyaan (NMBA) chu nimin khan an chairman Lalhriatpuia, bawrhsap kaihhruaiin an ṭhu a, ruihhlo donaa hmalak tawhna leh hmachhawpte an thlirho. NMBA hmalakna hi India rama district 372-ah kalpui mek niin, kumin hi a kum ngana a ni a; hemi pual hian November 2025 khian Ministry of Social Justice & Empowerment chuan PM Event a buatsaih dawn a ni.

Sangha man runpui

PMMSY scheme hnuaia Champhai leileta sangha khawitute leh Fisheries department ṭangkawp chuan nimin khan Champhai Zotlang, Phaipheiah 'Champhai Leilet Sangha man runpui' an buatsaih a; Fisheries director Laltleipuii a hawng. Sangha man runpuiah hian leilet sanghate hi Champhaia sangha man pangngai aia 30% a tlawmin hralh a ni a, kg 134 hralh chhuakin, a vaiin Rs 53,600 an lalut a ni.