Aizawlah Poshan Maah hman a ni

Health and Family Welfare department hnuaia AYUSH Directorate bultumin nimin khan Dawrpui Multipurpose Centre-ah Rashtriya Poshan Maah pualin hun hman a ni a; HFW principal director Dr Lalthlengliani, AYUSH director ni bawkin hmanpuiin, sikul sâwmte aṭangin zirlai 700 chuang leh zirtirtute an tel.

Dr Lalthlengliani chuan, thau lutuk chu tun hmain mi hausa deuhte natna anga ngaih ṭhin ni mah se, tunah chuan mi náwlpuiah a tam tawh thu a sawi a, "Thau lutuk hian natna hrang hrang - zunthlum, thisen sang, lung natna, stroke leh cancer chi hrang hrang a thlen theih avangin hriselna tiderthawngtu lian tak a ni. Awlsam taka inven theih a ni a, ei leh in lama duhthlanna dik leh hrisel neih a pawimawh," a ti.

Poshan Maah hmannaah hian AYUSH deputy director Dr S Mara Thansiami'n inlawmna thu a sawi a, AYUSH consultant Dr H Malsawmtluangi'n ei leh in hrisel chungchang leh Anganwadi Training Centre nutritionist Saitluangpuii Sailo-in adressing obesity chungchang an sawifiah. AYUSH programme officer Dr Shirley Lalbiakzuali Chhangte kaihhruaiin yoga instructor-te'n zirlaite leh zirtirtute chu taksa sawizawi pawimawhna an hrilhfiah a, a takin an tihpui bawk.

Rashtriya Poshan Maah hi kum 2018-a Prime Minister-in Ministry of Women and Child Development hnuaia kalpui Poshan Abhiyan (Nutrition Mission) hnuaia hman ṭhin a ni a; chaw ṭha pawimawhna te, mipui hriselna te, ei leh in ṭha leh nunphung dik pawimawhna inzirtir nan hman a ni ṭhin. Kumina thupui chu 'Thau lutuk tura inven nana thlum, al, leh hriak ei tlem' tih a ni.