Lab. technician-te tan training buatsaih

NHM hnuaia Free Diagnostic Service Initiative Programme (FDI) leh Regional Resource Centre for North East States (RRC-NE) ṭang dun chuan nimin khan Taxation auditorium-ah Health & Family Welfare department hnuaia laboratory technician-te tan Training for Free Diagnostic Services an buatsaih ṭan.

Training-ah hian haematology analyser leh semi-auto analyser khawl hman dan a taka inzirtir a ni a, Zoram Medical College & Hospital-a mithiamte'n an zirtir. Taxation department-a thawkte thisen an endiksak bawk. Training hi vawiinah chhunzawma zawh a ni ang.

Training for Free Diagnostic Services hawnnaa khuallian Dr Lily Chhakchhuak, NHM mission director chuan, Mizoram sorkar (NHM), Mizoram Health Systems Strengthening Project (MHSSP) leh PM-ABHIM te ṭanghoin tun hnai kum hnih chhungin facility tinah khawl mamawh hrang hrang dah a nih thu a sawi a, "Khawlte hi CHC, PHC leh UPHC-ah te dah vek a ni a, laboratory technician-te'n thiam taka an hman theih chuan mipui tan a ṭangkai hle dawn a ni," a ti.

FDI state nodal officer Dr Mary Zohmingliani chuan, laboratory technician-te chu an thawhnaah mipui tan an ṭangkai lehzual theih nan an khawl neihte an hmang thiam theihna turin training buatsaih a nih thu a sawi. RRC-NE Regional Resource Centre con-sultant Bhaswat Kumar Das chuan, hmarchhak state tinah laboratory technician-te tan training an buatsaih ṭhin thu a sawi bawk.