Manipal Hospitals-in Mizo zinga hnute cancer an enkawl tam tawh

Manipal Hospitals, EM Bypass, Kolkata hotute chuan Breast Cancer Awareness Month pualin nimin khan Aizawl Press Club-ah thuthar thehdarhtute an kâwm a; Mizoram aṭanga hnute cancer vei mi eng emaw zat an enkawl tawh thu sawiin, inven theih leh a hun taka enkawl theih a nih thu an sawi.

Manipal Hospitals surgical oncologist Dr Pooja Agarwal chuan, hmeichhe hnute cancer vei an hmuh chhuah chu enkawl hma an nih chuan dam taka enkawl theih an nih thu a sawi a, "A hun taka enkawl an nih theih nan mi tinte inven bakah, mahni dinhmun hriat chian a pawimawh. Hnute cancer veite hi an mimal nun thlengin nasa takin cancer hian a nghawng ṭhin a, hriatthiam an ngai hle. Hnute cancer chungchangah invenna tur leh a hun taka enkawlna chungchang inhrilh tam a ṭul," a ti.

Manipal Hospitals, EM Bypass hian Breast Cancer Champion’s Meet buatsaihin, hnute cancer an enkawl dam Juliet Lalruatmawii Ralte, Lalruatfeli leh Zonunmawii ten enkawl an nih dan press mite an hrilhfiah a; enkawlna ṭha an dawn avanga dam chhuak an nih thu an sawi.