Exhibition & Book Sale buatsaih

Art & Culture department chuan Annual Working Program 2025-26 hnuaiah nimin khan Khawzawl Electric Veng YMA Hall-ah Exhibition & Book Sale 2025 an buatsaih a, district bawrhsap K Vanlalṭhiana'n a hawng. Exhibition hi mi ṭhahnem takin an chhim a, vawiinah chhunzawm a ni ang.

Exhibition & Book Sale-ah hian Art & Culture department hnuaia subordinate office pali - Mizoram State Museum, Mizoram State Archives, Tribal Research Institute leh Mizoram Publication Board ten an thil vawn ṭhat chi hrang hrang 90 an pho chhuak a; State Archives-in Mizoram document pawimawh leh hlu bikte an rawn pho chhuak bawk. Tribal Research Institute leh Mizoram Publication Board ten lehkhabute tlawm zawka lei theih turin an zuar bawk a ni.