Minister-in Mizoram tlawh turin India mipui a sáwm

Sports & Youth Services leh Tourism department enkawltu minister Lalnghinglova Hmar chuan, kum 2026-ah Aizawl International Half Marathon lian leh ropui zawk buatsaih tum a nih thu sawiin, Mizoram tlawh turin India ram mipui a sáwm.

Lalnghinglova Hmar hian New Delhi Mizoram House-ah press conference neiin, Aizawl International Half Marathon chungchang a sawi a; February 14, 2026-ah Aizawl International Half Marathon neih tum a nih thu sawiin, "Kumina kan buatsaihah mi 1,500 an tel a, beisei phâk bâk a ni. Kum 2026-ah chuan mi 5,000 tal an tlân theih kan beisei," a ti.

Sports Minister chuan, Half Marathon-a tel tur leh Mizoram tlawh turin India ram mipui an sáwm tih sawiin, "Mizoram a awm tih pawh hre lote hnenah Mizoram tihlar kan duh. Aizawl hi rêlin awlsam taka tlawh theih a nih tawh avangin state pawn mi tam zawk kan beisei a, chu chu New Delhi-a media hmaah kan puang a ni," a ti a; half marathon lawmman belhkhawm (prize pool) chu Rs 20,00,000 aia tlem lo a nih dawn thu a sawi.

Tourism minister Lalnghinglova chuan, Mizoram chu khualzinte tlawh châkawm tak state a ni tih sawiin, "Kan inpho chhuah thiam loh vang te, inkalpawhna a harsat avang leh thlawhtheihna chuan man a to avangin tlawhtu an ṭhahnem tâwk thei lo. Tunah chuan rêl kan nei a, Delhi, Kolkata leh Guwahati aṭangin awlsam taka kal theih a ni," a ti a, Mizorama zin turin India mipui a sáwm.

Delhi-a thuthar thehdarhtute kawmnaah hian Aizawl International Half Marathon-a Mizoram sorkarin a thawhpui Innovations India hotu Capt. Rahul Bali chuan, Aizawl International Half Marathon an buatsaih leh turah mi tam zawk an beisei thu leh lawmman tam zawk pek a nih tur thu a sawi.

SYS department director H Lalhmingthanga pawhin, intlansiak hlawhtling zawk an buatsaih theih ngei a beisei thu sawiin, 2026-a intlansiak an buatsaih turah chuan naupang, puitling (mipa leh hmei-chhia) bakah, senior/veteran thlengin buatsaih a ni dawn thu a sawi bawk.

Press conference hi New Delhi Mizoram House resident commissioner Alexander V Chawngthu-in a kaihruai a; Lalnunthari Sitkil, IRS leh Lalramdinpuii Renthlei, IES te pawh an tel.