Rashtriya Poshan Maah khâr a ni

September 17, 2025-a hman ṭan Rashtriya Poshan Maah (National Nutrition Month) chu nimin khan Mizoram hmun hrang hrangah khar a ni a; Aizawlah chuan Aijal Club Park-ah Integrated Child Development Scheme (ICDS) kum 50 tlin lawm nghal a ni.

Aijal Club Park-a Poshan Maah kharna leh ICDS golden jubilee lawmna hi Directorate of Women & Child Development huaihawta hman a ni a, MLA VL Zaithanzama'n hmanpuiin, kumina Poshan Maah hmang ṭha zual district-te hnenah lawmman a hlan.

Rashtriya Poshan Maah 2025-ah hian thupui - mawm (oil), thlum(sugar) leh al (salt) ei tlem tih te, nupui fanaute hriselna atana mipa/pa ber mawhphurhna pawimawhna tih te, 'Zirtir la, ei tur ṭha pe rawh' tih te, nu hnute tui pawimawhna tihte inzirtir a ni. Thupui chi hrang hrang mila inzirtirna kalpui ṭha leh thing phun te tehfungah hmangin Poshan Maah hmang ṭha thlan a ni.

Poshan Maah hmang ṭha ber district chu Siaha district a ni a, Serchhip district leh Kolasib district ten an dawt. ICDS Project Level Award sem a ni bawk a, West Phaileng ICDS Project pakhatna niin, Bilkhawthlir ICDS Project leh Thingsulthliah ICDS Project ten an dawt.

Aizawl Urban ICDS Project leh Tlangnuam ICDS Project hnuaia mi 10 hnenah anganwadi centre-a kai ṭha naupangte hnenah lawmpuina khualzahawm Udit Prakash Rai, state sorkara secretary-in a hlan a; district level leh ICDS project level-a ti ṭha zualte hnenah Social Welfare secretary Lalzarmawii'n ICDS Project Level Award a hlan bawk.

Khuallian VL Zaithanzama chuan, Poshan Maah-in thupui a ken tel hrang hrangte inzirtir kawngah hma la chhunzawm zel turin thawktute a chah a ni.

ICDS kum 50 tlinna lawmnaah Women & Child Development director Zoramthangi Chhangte-in ICDS chungchang a sawifiah a; Mizoram puma anganwadi-te leh ICDS project-te data dahṭhatna tura software siam Mizoram Anganwadi Reporting Tools a tlangzarh nghal.