ICT Minister-in AI application a tlangzarh

Mizoram sorkar leh LushAITech ṭang dunin an buatsaih, MLA-te tana artificial intelligence (AI) zirhona Assembly Conference Hall-a neihah nimin khan Information & Communication Technology (ICT) minister Dr Vanlalthlana'n AI application ‘LushAIEdu PLS’ leh 'Success AI Career Guidance' a tlangzarh.

LushAIEdu PLS hi zirlaite zirnaa pui theitu tura buatsaih a ni a, Success AI Career Guidance chu hna zawng mekte pui theitu tur a ni thung. App-te hi LushAITech siam a ni a; Success, AI Career Guidance hi web base niin, sucess.lushaiedu.com aṭangin luh theih a ni; LushAIEdu PLS chu app-base niin, appstore aṭanga lak theih a ni thung.

ICT Minister chuan, LushAIEdu PLS leh Succees AI Career Guidance te chu zirlaite leh hna zawng mekte tan a ṭangkai tur thu a sawi a, "Subject hrang hrang leh exam hrang hrang an inbuatsaihna kawnga pui theitu tur a ni. Mizoram University hnuaia zirna-in hrang hrangahte AI course hrang hrang introduce a ni dawn," a ti.

Minister Dr Vanlalthlana hian MLA-te leh sorkar hnathawk chu tunlai thiamna mila intuai hriam zel tur leh, a ṭha zawnga AI hmang ṭangkai deuh deuh turin a chah a ni.