Children Science Congress buatsaih a ni

Samagra Shiksha leh STAM ṭangkawp chuan nimin khan Champhai leh Saitualah sikul zirlaite pualin district level Children Science Congress an buatsaih.

Champhaiah chuan DEO conference hall-ah Children Science Congress buatsaih a ni a, high school panga leh middle school 10-a zirlaite'n project an neihte an sawifiah. M/S section-ah Ramnunsangi, Hnahlan M/S chu pakhatna a ni a, T Malsawmtluangi, Bethel Mission School leh Lalrinkimi, Khawbung M/S-te chu pahnihna leh pathumna an ni. H/S section-a pakhatna chu Lalrinchhana, Khawbung H/S a ni a, Rinchungnungi, GM H/S leh Esther Lalchhanchhuahi, Einstein H/S ten an dawt.

Saitualah chuan district bawrhsap Dr Lalngura Tlau-in Saitual Venglai Gospel Centenary Hall-ah Children Science Congress a hawng a; sikul pariat aṭangin zirlaite'n project 12 pho chhuakin an sawifiah.

Junior category-ah Presbyterian English School, Saitual pakhatna an ni a; Buhban Secondary School (RMSA) pahnihna niin, PES, Keifang pathumna an ni. Senior category-ah Saitual H/S pakhatna an ni a, Buhban Secondary School (RMSA) pahnihna niin, Saitual HSS chu pathumna an ni.

District level Children's Science Congress-a ti ṭha zualte hi November 26-27, 2025 chhunga state level Children Science Congress-ah an district aiawhin an tel dawn a ni.