STPI din theih dan tur ngaihtuah

Information & Communication Technology (ICT) minister Dr Vanlalthlana chu October 15, Nilaini khan a pisaah Software Technology Parks of India (STPI) director general Arvind Kumar nen an inkâwm a, Mizoramah changtlung leh chak zawka STPI din theih dan tur an sawi dun.

Dr Vanlalthlana chuan, Mizorama ṭhalai zinga IT kaihhnawiha ngaihtuahna leh thiamna neite leh ei zawng duhte'n bul an ṭan theih nan STPI chu Mizoramin mamawh tak a nih thu a sawi a, "Chak taka hmalak a nih theih nan state sorkar chuan theihtawp a chhuah dawn a ni," a ti.

STPI chu Aizawl bakah Lungleia din a nih theih dan sawiin ICT Minister chuan, "Aizawlah chuan Mizoram University, Natoinal Institute of Technology, NIELIT leh computer application course zirlaite behchhana din theih a ni," ti a; Lungleiah pawh Mizoram Engineering College, Mizoram Polytechnic leh computer application course zirlaite behchhana din theih a nih thu a sawi.

STPI Director General chuan, STPI din dan tur ruahman turin ICT Minister an chah a, "Rang taka hmalak kan inhuam," a ti.

Mizoram sorkar thuchhuah tarlan danin, STPI Director General hi Dr Vanlalthlana leh Ministry of Electronics and Information Technology minister Ashwini Vaishnaw indawrna bawhzuia rawn zin a ni.