Bána Kaih Phase I-ah loan dilna zinga 128 bank-te'n an hnâwl tawh

Mizoram State Policy Coordination Committee (MSPCC) vice chairman Dr KC Lalmalsawmzauva hoin nimin khan Mizoram sorkar flagship programme Bána Kaih (Handholding) scheme hnuaia loan component chungchanga hmalakna thlirhona, quarterly meeting neih a ni. Bána Kaih Phase-I hnuaia committee-in loan dil tura progress partner atana a thlan, bank-te'n an lo hnâwl 128 an awm thu an tarlang.

Ṭhutkhawma tarlan danin, Bána Kaih Phase-I hnuaia loan pek tura Committee-in a thlan, bank-in an lo hnâwl 128-te chu an lo hnawl chhan tarlan a ni a; a chhan zingah - loan diltuin loan dang rulh mek a neih vang te, loan chhia - Non Performing Assets an neih tawh vang te, hmalakna behchhanna tur in hmun/lo/ram chungchangah fel lo a awm avang a ni. Chhan dangte pawh a awm a, diltu zingah anmahni duh thua inhnûk kîr leh an awm.

Meeting-ah hian Bâna Kaih Phase-I hnuaia loan la tawhte'n hma an lak dan leh scheme inkaihhruainain a phût anga sorkar department-te'n loan late an vil zuina (monitoring) lama an hmalaknate sawiho a ni. Sorkarin loan pung a rulh lêt chungchang te, EDP training leh food processing loan scheme PMFME chungchangte sawiho a ni bawk.