Health Minister-in WHO hnuaia pawlte Mizorama thawhhopui atan a sáwm

Health & Family Welfare minister Lalrinpuii chuan October 17, 2025 khan Geneva, Switzerland-a World Health Organiasation (WHO), Doctors Without Borders (Medecins sans Frontiers) leh International Red Cross Society hotute a kâwm a; hriselna kaihhnawiha thawhhopuiah a sáwm.

Lalrinpuii hian WHO consultant Soma chu a pisaah kâwmin, Mizoram chu India ram kilkhawr taka awm a nih thu leh, a bikin thingtlanga chengte zingah nu leh naupang hriselna dinhmun a la ṭhat tâwk loh thu a hrilh. Mizorama Health department tichak tura hmalak mekna - hri danna pek (immunization) leh, nu leh naute hriselna leh khawtlang mipui hriselna (public health)-ah WHO-in Mizoram a puih ṭhinnaah lawmthu sawiin, nasa zawka Mizorama hma la turin a sáwm a ni.

Doctors without Borders hotu Marie Elosabeth nen an inkawmnaah Lalrinpuii chuan, Mizoramin HIV/AIDS donaah, Mizoram State AIDS Control Society (MSACS) hmalakna tichak tur leh AIDS veite enkawlna leh HIV laka invennaah Mizoramin puih a mamawh thu a hrilh a; Mizoram chu India rama mipui zat aṭanga chhûta cancer vei tamna ber a nih chungchang zir chiansak turin a ngen.

Marie Elosabeth chuan, minister Lalrinpuii ngenna chu theih anga an lo bawhzui tur thu a sawi a; Mizorama an project kal zelnaah state sorkar thlawpna ṭha tak an dawn ṭhin avanga an lawm thu a hrilh.

Doctors Without Borders hian Lawngtlai leh Champhai district-a ral-tlante tan health sector-ah project an kalpui tawh ṭhin a, tunah hian Zokhawtharah raltlante tan hriselna lamah hma an la mek.

Health Minister hian International Red Cross Society hotute hnenah Mizoram chu India hmar-chhak kilkhawr taka awm a nih bakah, international border a nih avangin hnam tenau ho zingah hriselna dinhmun a la hniam thu hrilhin, thawhhopuiah a sáwm a; ICRC hotute chuan ngun taka an lo ngaihtuah tur thu leh theihtawp an chhuah tur thu an sawi.