Thenzawl Peace City master plan siamtute leh sorkar hotute inkâwm

Thenzawl Peace City ruangám (master plan) siam tura thlan Infrastructure Professionals Enterprise (IPE) Global hotute leh sorkar hotute chu October 17, 2025 khan Chief minister Lalduhoma hoin an ṭhukhawm. CM chuan, IPE Global hnathawh chu a ṭul dan azirin Mizoram State Project Monitoring Committee-in an vil dawn thu a sawi.

CM Lalduhoma chuan, Thenzawl Peace City chu Mizorama plan city hmasa ber leh awm chhun a nih dawn thu sawiin, "Khawpui changkang leh mawi tak, khualzinte tlawh nasat khua ni khawpa duan kan duh," a ti a; ṭha tak leh chak takin hna thawk tura chahin, a ṭul dan azirin MSPMC-in an vil dawn thu thu a hrilh.

Sorkar thuchhuah tarlan danin, Thenzawl Peace City master plan siam chungchang pre bid queries chu ngaihventu company 18 an awm a, tender chhuah a nih hnuah chhângtute uluk takin endik a ni. Master plan siam turin IPE Global thlan a ni a, anni hi ram 100 aia tama hma lo la tawh, ram pangaa pisa nei, India ramah hmun 20-a pisa nei leh India hmun hrang hranga city master plan siam tawh an ni.

IPE Global hi Mizoram sorkar chuan inremna a ziahpui tawh a; inremna ziah aṭanga chawlhkar thum chhungin Mizoramah pisa an hawng ang a, hna an ṭan nghal dawn a ni.

Ṭhutkhawmah hian UDPA minister K Sapdanga, GAD secretary Sudir Kumar leh UDPA secretary Lalmalsawma Pachuau bakah sorkar mi pawimawh dangte an tel a; IPE Global aṭangin senior development expert Anil Bansal leh expert dangte an tel.