Home Minister-in SSWRC a tlawh

Minister K Sapdanga chuan October 18, Inrinni khan a bial chhunga State Social Welfare & Rehabilitation Centre (SSWRC) a tlawh a, Scout Silver Award lawmna a hmanpui. Minister hi UDPA director Jacob Lalawmpuia'n a ṭawiawm a, award lawmpui nan UDPA aṭangin Rs 20,000 a hlan.

K Sapdanga chuan, SSWRC-in national award an dawng chu ropui a tih thu sawiin, "Mi dangte thil zirtir te, damlo tihdamte leh sakhaw rawngbawlnate hi hna ngaihsanawm tiin an sawi ṭhin. Heng thil ropui tak tak pathumte hi he Centre-ah hian a kim vek a, he rawngbawlna hi a ropui tak zet. Kan mission tihhlawhtling tura hmun ṭha, mi dang tlawh pawh phak em em lo tura hna thawhna hmun chu he hmun hi a ni," a ti.

Tunlaiin Aizawlah thihna rinhlelh-awm leh rilru tina, thih chhan inrinsiakte hriat tur a tam sâwt thu sawiin K Sapdanga chuan, "Nun dawihzep vangin harh fima khawvel hmachhawn ngam lo kan tam hi a pawi tak zet. Damna atana pawimawh ka tih chu, ni tina hma lam pan a, chona thar hmachhawn ngam nun hi a ni," a ti a; SSWRC-a thawkte leh enkawl mekte chu huaisen taka khawvel hmachhawn zel turin a fuih.

SSWRChi kum 1990 khan Protective Home tih hming vuahin din a ni a, kum 2020 khan SSWRC tia thlak a ni. Mi 1,400 chuang an enkawl tawh a, thawktu mi 22 an awm mek a ni.