Kawng la siam ṭan loh chhan sawifiah

National Highway 306 & 06 thawm ṭhat hna thawh mek chungchangah national highway enkawltu NHIDCL aiawhte chuan sorkar laipui aṭanga pavement quality concrete (PQC) siamna tur approval an la hmuh loh avangin kawng chhe zual lai siam runpui chu ṭan a la nih loh thu an sawi.

Kolasib additional DC B Malsawmtluangi kaihhruaiin October 17, 2025 khan NH 306 & 06 thawmṭhat hna thawh mek chungchangah sorkar hotu te, khawtlang leh pawl hruaitu te, NH enkawltu NHIDCL, kawng siam hna thawktu Jandu Construction Company leh kawng khuar lai hnawhtu BR Goel aiawhte an ṭhukhawm a; B Malsawmtluangi chuan an thurelte chu minute felfai taka ziak chhuakin thuneitu sang zawkte hnenah thlen a nih tur thu a sawi a ni.

Tarlan danin, NH kawngpui siam hna hi Jandu Construction Company kutah awm mah se, ruahtui a la tlak avangin hna an la ṭan thei rih lo. Hemi kar lakah hian BR Goel-te chuan Jandu Construction Company nen inremna (internal agreement) an neih angin kawng khuar lai hnawh (pothole fillings) hna an thawk a ni.

Ṭhutkhawmah hian NHIDCL aiawhte chuan leilung nghet tawk lote, kawngpui aṭanga tui pût te leh tui luan kawr (side drain) mumal loh avangin kawng thawmṭhatin a daih rei loh ṭhin thu an sawi a; hengte avang hian sorkar laipuiah pavement quality concrete (PQC) tih tura dilna an thlen tawh thu leh PQC siamna tur hi approval an la hmuh loh avangin a chhe zual lai siam runpui hi ṭan ala nih loh thu an sawi a; BR Goel-te chuan an hnathawh mek, kawng khuar zual lai hnawh chu October 25, 2025 hmaa zawh an tum thu an sawi.

Jandu Construction Company aiawhte chuan kum khat chhung agreement an neih angin nakkum March thla hma ngeiin kawngpui metal /bitumen phah hna thawh zawh theih an inbeisei thu an sawi a; Kolasib huamchhung bik pawh a khuar lai hnawh leh bitumen phah chu November 2025 aṭangin an ṭan theih an beisei thu an sawi bawk.