Khawlai nun aia infiamna tualzawl thlang turin Larsapin ṭhalaite a chah

Governor Gen. Dr Vijay Kumar Singh chuan Mizoram ṭhalaite chu hun hman nan khawlai nun aiin infiamna tualzawl thlang zawk turin a chah.

Larsap hian October 18, Inrinni zan khan Rajiv Gandhi Stadium-ah WATO Trust-in Project Bramhastra hnuaia Football Exhibition Match - Awareness Campaign Against Narcoterrorism an buatsaih a hmanpuinaah thu a sawi a, "Khawvel hmasawn zelah buainate a khirh chho zel a, ruihhloin min rùnna pawh a nasa telh telh. Ṭhalaite'n hun hman nan khawlai nun hnâwlin, infiamna tualzawl thlang zawk ang che u," a ti.

Ruihhloin chhungkua, khawtlang leh ram pum a ei chhe mek tih sawiin Governor chuan, "Ruihhlo dona Project Bramhastra pianna leh bul ṭanna Mizoram a ni hi thil chhinchhiah tlak a ni. Ramri kaltlanga ruihhlo tawlhrukna kawngpui kan nih avangin ruihhlo hneh turin kan zavaia ṭanrual a ṭul," a ti a; Mizoram chu ruihhloin a hneh theih loh state tia khawvel hriat leh hmuh theiha pho chhuah tum turin mi tin a chah.

Exhibition Match cum Awareness Campaign-ah hian Project Bramhastra 3x3 basketball tournament lawmman leh scholarship sem a ni a; WATO Trust president Dr Yogita Karache leh Assam Rifles DIG Brig. Puspendar Sorayan te pawhin thu an sawi. Miss Grand India 2025 runners-up Vanlalnuntluangi kaihhruaiin kal khawmte'n ruihhlo laka fihlim turin thu an tiam a ni.