Chhanzova'n finance lam mithiamte a kâwm

Minister of state B Lalchhanzova chuan October 18, Inrinni khan Kolkata Mizoram House, Salt Lake-ah Ministry of Finance hnuaia principal economic adviser hlui Dr Dipak Dasgupta (climate scientist) leh Joy Chakravarty a kâwm.

Inkawmnaah hian Climate Finance hnuaia Mizoram tana hmalak theihna kawngte chak zawk dap dan tur zawn a ṭul thu sawi lan a ni a; thingtlanga tlang ram loneih hlâwk tawh lo chungchang te, sik leh sa inthlak vanga eizawnna danglam mek te, sawhthing chin eizawnnate leh Mizoram chungchang thil dangte an sawiho a ni.

B Lalchhanzova chuan, Mizoramin a chhe zawnga sik leh sa inthlak tiziaawm tura hmalaknaah priority sector a siam theih nan hmanhmawh a ngaih thu a sawi a; August 1, 2025 khan Bhubaneshwar-ah Green Climate Fund (GCF) regional workshop-a a tel thu leh August 3, 2025 khan Aizawlah sawihona nei a nih thu sawiin, January, 2026-ah Regional Workshop for North East chu Mizorama neih a nih theih nan sorkar laipui leh UNDP lam nen an indawr mek thu a sawi bawk.

Dr Dipak Dasgupta chuan, Climate Finance chungchangah Mizoram sorkara department hrang hrang bakah, financial institution-te leh zirna-in te, khawtlangte ṭanrual a ṭul thu Dr Dasgupta chuan a sawi.

Sorkar thuchhuah tarlan danin, EFCC minister Lalthan-sanga leh minister of state pahnih - Prof. Lalnilawma leh B Lalchhanzova te chu Climate Finance chungchanga hma la tura a ruat an ni a; chumi atana hmalakna kal zelah minister B Lalchhanzova hian Mizoramin UNDP Green Climate Fund a hmuh ve theih dan tur leh Mizoramin a hman ṭangkai ve theih dan turte Kolkata-ah mithiamte a sawipui a ni.