Police martarte sûnna hun hman a ni; Mizoram police martar 54 an awm tawh

Nimin khan India ram pumah police, an duty laia ram tana thite sûnna hun, Police Commemoration Day hman a ni a, Mizoramah pawh hmun hrang hrangah hman a ni. Kum 1966 aṭanga nimin thlengin Mizoram Police zingah ram leh hnam tana nunna hlan (martar) mi 54 an awm tawh.

Police Commemoration Day hi Mizoramah chuan zing dar 7-ah hman ṭan a ni a, a hmanna pui ber chu Martar Thlan, 1st Bn MAP, Armed Vengah neih niin, district headquarters leh battalion headquarters tinah ram tana martar police-te sûnna hun hman a ni.

1st Bn MAP hmuna Martar Thlanah hian Mizoram Police senior officer-te bakah, CRPF, SIB leh Assam Rifles aṭanga officer-te'n zahna pangpar an dah.

October 21, 1959 khan DCIO Karam Singh kaihhruai 3rd Battalion CRPF police party tlemtêin Ladakh hmuna Hot Springs area, tuipui aṭanga ft. 15,000 chuanga sangah ramri venga an kal lai chu Chinese sipaite'n an lo lambun a, CRPF mi 10 an thi a, pasarih an hliam.

Kum 1960-a ‘Annual Conference of IGP of States and UT’ chuan October 21 chu Police Commemoration Day atana pawm turin resolution an siam a; hemi kum aṭang hian kum tin October 21-ah Police Commemoration Day hman ṭhin a ni.

September 1, 2024 leh August 31, 2025 inkarah India ram pumah police 191-in ram leh hnam tan nunna an hlan a; Mizoram Police zingah duty laia hmelma kuta thi an awm lo. August 15, 1947 aṭanga August 31, 2025 thlengin India ramah police mi leh sa ram tana nunna hlan mi 36,637 an awm tawh bawk.