Hnufual leh changkang lo nihna aṭanga chhanchhuah che u kan duh - Lalduhoma

ZPM Dampa West Block chuan nimin khan New West Phailengah Dampa by-election campaign hawnna hun an hmang a; thusawitu chief minister Lalduhoma chuan, Mamit district chu district hnufual leh changkang lo an nihna aṭanga chhanchhuah an duh thu a sawi.

Lalduhoma chuan, Dampa bial chu India rama district hnufual leh changkang lo, aspirational district chhunga mi a nih thu sawiin, "Hei hi ZPM chuan chhanchhuah che u kan duh. Kum 38 vel chhung khan Congress leh MNF sorkarna hnuaiah ruling bial in lo ni tawh ṭhin a, tuna hetiang dinhmuna in awm chhan hi a lo bial tawhtu che u khan mawh an phur kan ti lo thei lo," a ti.

Dampa bial chu opposition bial a ni chungin ZPM candidate Vanlalsailova'n Dampa bial mamawh a thlen ṭhin thu sawiin Lalduhoma chuan, "Theihtawp a chhuah ṭhin. Special Priority Project hnuaia hnate min rawn dil a, chumi hnuaiah chuan khaw tinin hna in thawk mek a, ka bial aiin in vannei a ni," a ti a; Dampa biala sorkar hmalakna hrang hrang sawiin, ZPM candidate vote turin Dampa bial mipui a sáwm.

Lalduhoma chuan, Mizorama by-election awm tawhah ṭum hnih opposition candidate an chak tawh tih loh chu ruling party an chak vek tih sawiin, "Eng emaw thil danglam bik a thleng a nih loh chuan by-election hi ruling party chanah dah a ni deuh ṭhin a, Dampa bialah pawh hian chutiang chu a kan beisei," a ti.

ZPM candidate Vanlalsailova pawhin thu sawiin, "Kan bial hi opposition bial aṭanga ruling biala awm ve tur leh he bial chhanchhuak tur hian party sawi loa min vote vek turin ka ngen che u a ni... Ka elpuite hi thiamna leh tawnhriatah ka tluk lohte an ni a, amaherawhchu, he bial hmangaihna kawngah chuan min tluk lo ang," a ti a; bialtu MLA thi ta Lalrintluanga Sailo hmalakna leh duhthusam tihlawhtling tura theihtawp chhuahpui turin a ngen.

Minister C Lalsawivunga pawhin thu sawiin, "Rruling bial nihna hun ṭha in neih hi in bawhpelh loh a, ruling party candidate vote tlin nachang in hriat ka beisei," a ti a; ZPM vice president leh Dampa By-Election Campaign Committee chairman C Lalnunnema chuan, "Pu Sailova ringawt hi kan rawn zuar lo a, kan CM Pu Lalduhoma leh kan minister-te hi kan rawn zuar tel a ni," a ti bawk.