Intiamna tihlawhtling ngai lo-ah MPCC hotuin ZPM leh MNF a puh

Mizoram Pradesh Congress Committee (MPCC) president Lal Thanzara chuan, Congress party chu inthlan dawna an intiamna tihlawhtling ṭhin an nih thu a sawi rualin, sorkar mek ZPM leh MNF party-te chu intiamna tihlawhtling ngai lo-ah a puh.

Lal Thanzara hian nimin khan Dampa bial by-election atan campaign-in Kanghmunah hun a hmang a; ruling party-in an candidate chu an duh ber nia a lan loh thu leh MNF pawh an candidate turah party chhungah sawi neuh neuh a awm niin a sawi a, "Heng karah hian beiseina kan nei. Congress party hi inthlan dawna kan intiamna tihlawhtling ṭhin kan ni a, tuna sorkar mekte leh MNF-te hian an intiamna an tihlawhtling ngai lo," a ti.

ZPM policy - Bâna Kaihah mipui an beidawng hle nia sawiin Lal Thanzara chuan, "Central scheme awm sa anmahni siam angin an sawi. Keini chuan NLUP keimahni siam kan sawi a, kan tihlawhtling a, chhungkua 1,40,000 chuang NLUP hmangin kan chhawmdawl," a ti a; ZPM sorkarin sum leh pai an nei lo a, Central sorkarin a hrek mek niin a sawi.

MPCC President chuan, Congress party chu India ram dan zamtute an ni a, an hotute'n India ram chu sakhaw zalenna ni tura an tih thu sawiin, "BJP hian an ngaithei lo hle. Tunah hian kan missionary-te pawhin missionary an inti ngam tawh lo. ZPM leh MNF te hi chutiang titute thláwptu an ni hi Kristiante tih atan a mawi lo a, a lungchhiatthlak tak zet a ni. Ringtu kan nihna ang pawhin kan hnualsuat a ngai a ni," a ti.