Minister pahnih kaihhruaiin Agriculture Land Survey sawiho

Agriculture & Farmers’ Welfare (AFW) minister PC Vanlalruata leh Land Revenue & Settlement (LRS) minister B Lalchhanzova te kaihhruaina hnuaiah nimin khan Agriculture Land Survey chungchang Aijal Club-ah sawiho a ni a; depatrment pahnih bakah, Horticulture leh District Council & Minority Affairs department hotute tel.

Agriculture Land Survey hi Digital Agriculture Mission péng pakhat, Agristack atana hmalakna a ni. Agriculture department chuan digital crop survey an kalpui ṭhat avangin SASCI hnuaiah cheng vbc 50 bakah, hmarchhak state ti ṭhate tana cheng vbc 10 an dawng thei dawn. LRS department pawhin Handholding scheme hnuaia CM’s Land Reforms Programme aṭangin cheng vbc 5 an hmu dawn bawk.

PC Vanlalruata chuan, Digital Agriculture Mission chu mission namailo a nih thu sawiin, "Sorkar hmalakna atana data neih ṭhat a pawimawh a, data hmang chuan loneitute chu an thil mamawhte nena tuahrem an ni thei dawn a ni," a ti.

B Lalchhanzova pawhin thu sawiin, "Department-te inmamawh tawn kan ni. Mumal taka thawhho nan convergence framework changtlung neih a ṭul," a ti a; thawhhona ṭha rah chhuah chu ram tan leh loneitute tan hmasawnna leh thlamuanna a nih dawn thu a sawi.

Ṭhutkhawm hi district hrang hrang aṭangin bawrhsap te, autonomous district council hruaitute leh department hotute’n video conference hmangin an chhim a ni.