KHAWTHLIR

Hming pe lut

Dampa bial by-election-a PC party candidate tur K Zahmingthanga chuan nimin khan returning officer Malsawmzuala hnenah hming a pe lut a, thutiam a sawi nghal. K Zahmingthanga hian amah vote ṭheuh turin Dampa bial mipui a ngen a ni.

Buh sengpui

Ailawng Tlangcheng rama loneitute chuan October 20, Thawhṭanni khan buh an seng a; GAD secretary Sudhir Kumar, Art & Culture secretary Zodingpuii, IPRPS secretary Betsy Zothanpari Sailo, Art & Culture joint secretary TC Lalkhuma leh director Carol VLMS Dawngkimi ten an hmanpui.

Ruahmanna thlirho

Lawngtlai bawrhsap Donny Lalruatsanga hoin nimin District Skill Committee (DSC) an ṭhukhawm a, Lawngtlai district hmasawnna tura ruahmannate an thlirho. District Skill Development Plan felfai tak siam a nih theih nan a hun takah format awm sa hmanga skill training awm theite chu DSC-ah November 2025 chhungin proposal thehluh ni se, an ti. Proposal-te chu thlitfim a nih hnuah Labour, Employment, Skill Development and Entrepreneurship department-ah thehluh a ni ang.

Kawng chanve khâr

PHE department chuan Chhimphei Water Supply Scheme hnuaiah October 20, Thawhṭanni aṭang khan Melthum leh Hualngohmun inkarah pipe phûm hna an thawk mek a, hei vang hian kawngpui zatve khâr niin, lirthei intlân chhâwktir ṭhin a ni. Pipe phûm zawh a nih hma chuan lirthei tlân chhâwktir ṭhin a ni ang.

Chite lui thian fai

Bethlehem Venglai Pastor Bial Kohhran Pavalai Pawl chuan October 20, Thawhṭanni khan nilêngin Chite lui tifaiin an hnatlang. Hnatlangah hian mi 50 chuang an thawk chhuak a, Chite luia bawlhhlawh tam tham tak la khawmin, Tuiriala bawlhhlawh sawngbâwlna hmunah an paih a ni.

Assessment Camp thlirho

Lunglei additional DC Zoramdini hoin nimin khan a pisaah Lunglei district-a vohbikte chawikanna tura hmalakna Project LEAP hnuaia October 23-24, 2025-a Lungsen leh Tlabunga vohbikte hriselna dinhmun endikna, health assessment camp buatsaih tura inbuatsaihna thlirho a ni. Ṭhutkhawmah hian camp buatsaih turah hian vohbik dinhmun zirchianna (PwD Survey) aṭanga chhinchhiah sa vohbik - Lungsen block-ah 63 leh Tlabung block-ah 72 tinzawn an nih thu tarlan a ni.

Painting Exhibition

 Art & Culture director Carol VLMS Dawngkimi chuan nimin khan IPR Lianchhiari Rûn Art Gallery-ah David Ralte, Champhai Ruantlang leh Lalrammawia, Durtlang North te lemziak pho chhuahna 'Duet Painting Exhibition' a hawng. Exhibition-ah hian lemziak 45 pho chhuah a ni a, October 24, 2025 thleng buatsaih a ni ang.