Mizoramah sumdawnna kawnga inchimralna a thleng mek zel - MIMA

Mizoram Merchant Association (MIMA) chuan thuchhuah siamin, iron rod leh cement zuar zingah Mizo dik tak 20% pawh an awm tawh lo tih AMCIRDA hruaitute'n an sawi thu an tarlang a, "Mizoramah sumdawnna kawnga inchimralna (economic assimilation) a thleng mek zel," an ti.

MIMA chuan, Mizote'n hnam dang hnena an hming hawhtir a, hnam dangin sumdawnna an kalpui hlauhawmzia Mizo tam takin an la hre lo niin an sawi a, "Mizo hminga GST register leh company lam thil lakna register-na hming (proprietor) Mizo hming vaiin an hmang lo thei lo a, leiba neitu chu Mizo a lo ni ta a ni. Leiba a tam a, buaina a awm chuan vai/hnam dang a tlanbo palh chuan Mizo, hming hawhtirtuin a tuar ngei dawn a ni," an ti a; hming hawhtirna man sum tlemtê ûm vangin thubuai rip tak leh leiba rip tak neih theih a nih thu an tarlang.

MIMA chuan, Chhinga Veng LC leh tlawmngai pawlte'n tun hnaia an veng chhunga dan loa sumdawng te, Mizo hming hawha sumdawngte leh Mizorama an awm chhan ang loa sumdawngte mi panga an man chhuak leh October 2025 chhunga an dawr titawp tura an ti chu ṭha an tih thu an tarlang a, "Hetianga hma an la hi a ropui a, Mizorama sumdawngte leh kan hnam tan a hlu tak zet a, lawmawm kan tiin an hmalakna kan thlawp tak zet a ni," an ti a; Chhinga Veng hmalak dan chu Aizawla veng tin leh Mizorama khaw tinin entawn theih se an duh thu an sawi.

In neitute chu an inte dan loa sumdawngte luahtir lo tur leh, hnam dangte luahtir lo turin MIMA chuan Mizo mipui an ngen bawk.