Tui hnianghnar loh chhan sawifiah

PHE engineer-in-chief Zodinthari chuan mipuite hnena ngenna leh hriattirna a tichhuak a; Aizawl khawpuiah tui sem tur duh anga a tam tawk loh chhan a sawifiah.

Zodinthari chuan, kumin fûr ṭan tirah Vaivakawn Zohnuaiah (Greater Aizawl Water Supply Scheme Phase-III) pipe line chu lei chêin a tihchhiat avangin Phase-III aṭangin tui pump chhuah theih a nih tawh loh thu a tarlang a, "Tlawng Reiek kai aṭanga GWASS Phase-I leh Phase-II aṭanga tui pump chhuah ṭhin pawh ruah a sûr apiangin tui tihfim theih loh khawpa a nut nasat ṭhin avangin tui pump chhuah theih zat tur pump chhuah theih a ni lo ṭhin," a ti.

Tui a nut chhan chu Tlawng lui fintu lui tê hrang hrangah mipuiin leivûng an paih vang te, kawng laihna leivûng paih vangte leh ramhnuai leimin vangte a nih tlangpui thu tarlangin PHE E-in-C chuan, "Tui a nut nasat lai phei chuan NTU 1,000 chuangte a ni ṭhin," a ti a; Aizawl khawpuiin ni tin tui 38 MLD (million litre per day) a mamawh laiin, GAWSS Phase-I & Phase-II aṭangin ni khatah MLD 25-28 vel chauh pump theih a nih thu a tarlang.

PHE E-in-C tarlan danin, Aizawl khawpuiah chawhrualin thla khat chhungin tui connection pakhatah tui vawi hnih-khat bak sem tur a awm thei lo.

Zohnuaiah Phase-III pipe line siam mek a ni a, PWD-in kawng chhak lam leimin dâwlna an siam mek bawk. Ruah a la sûr ṭhin avangin lei a la tawlh zel a, chuti chung chuan ngawrh takin PWD leh PHE ten hma an la mek zel. November 2025 chhungin a nih tur ang takin tui pump chhuah leh theih beisei a ni.