Lawngtlai district-ah sikul 646 a awm

Lawngtlai District Education Committee chuan nimin khan an chairman Donny Lalruatsanga, district bawrhsap hoin zirna hmasawnna atana hnathawhte leh hmachhawpte an thlirho. Lawngtlai district-ah hian sorkar leh private sikul 646 bakah, ICT school 49 leh PM Shri school pathum a awm mek tih tarlan a ni.

Lawngtlai Bawrhsap chuan, Lawngtlai district chu zirna lamah a hniam hle tih sawiin, zirnaa district dangte entawn tlak ni tura theihtawp chhuah turin kal khawmte a chah a, "Lawngtlai district hi autonomous district council hnuai a nih angin Mizoram sorkar hnuaia Education department bakah LADC leh CADC hnuaiah sikul eng emaw zat a awm a, hei hian harsatna thlen loin hmasawnna zawk a thlen theih nan thawhhona ṭha tak a awm a pawimawh," a ti.

Ṭhutkhawmah hian Lawngtlai district-a primary school aṭanga higher secondary school thlenga hmasawnna hnathawhte leh hmachhawpte sawiho a ni a; elementary, secondary leh higher secondary school annual composite grant chu uluk zawka vil leh endik ṭhin ni se, an ti.

Tarlan danin, Lawngtlai district-ah hian LADC, CADC, Education department, private leh Samagra hnuaiah primary school, middle school, high school leh higher secondary school 646 a awm mek a; ICT school 49 leh PM Shri school pathum a awm bawk a ni.