District pahniha mi 2,990 endikah awrpuar 2.64% hmuh chhuah a ni

Nimin kha Global Iodine Deficiency Disorders Prevention Day a ni a, Health Worker Training School, Kulikawnah hman niin, National Health Mission (NHM) mission director Dr Lily Chhakchhuak-in a hmanpui. Mizoram district pahnihah mi endik zingah awrpuar 2.64% hmuh chhuah a nih thu tarlan a ni.

NIDDCP state programme officer Dr Lalawmpuia Chhangte tarlan danin, kumin 2025 chhungin Serchhip district leh Kolasib district-ah survey neih a ni tawh a, mi 2,990 endik aṭangin awrpuar 2.64% vel hmuhchhuah a ni. Chi sample 1,34,613 endik tawhah iodine awm tur zat ang a awm a, State Laboratory-ah chi sample 300 endik a ni tawh.

NHM Mission Director sawi danin, awrpuar zirchianna (survey) hmasa ber kum 1978-a neihah awrpuar 69% hmuhchhuah a ni. National Family Health Survey 2013-14 ah chuan Mizoramah awrpuar 6.65% vel an awm a, kum 2019-21-a NFHS-5 ah chuan 0.376% chauh an awm tawh.

Dr Lily Chhakchhuak chuan, Iodine Deficiency Disorders Prevention Day-in a tum ber chu India ramah iodine tlakchham vanga harsatna awm theite do beihpui thlakna a nih thu a sawi a; iodine telna chi chauh ei turin mipui a chah.

Tun hmain Mizoramah iodine tlakchham vanga awrpuar an tam ṭhin thu sawiin Dr Lily chuan, "India sorkarin NIDDCP programme a siam hnua iodine tel lohna chi zawrh a khap aṭanga thawktute'n theihtawp an chhuahna zarah awrpuar an tlem tawh a, a lawmawm hle," a ti.

Global Iodine Deficiency Disorders Prevention Day hmannaah hian NIDDCP technical officer Dr Nathan Vanlalhruaizela'n iodine nihphung, iodine tlakchham vanga taksa leh rilrua harsatna hrang hrang siamṭhat theih tawh loh awm ṭhinte a sawifiah. Iodine tlakchham vangin nauchhiat, thla kim loa nau hrin, hlamzuih, nau thi saa piang, pianphunga rualban lohna, ṭawng thei lo, bengngawng, mitkalh, rilru kim lo leh chak lo, sawngnawi, fuke tawi te a awmtir theih thu a tarlang.