Tourism-a hmasawn turin Mizoram thilte kan ngaihlut a pawimawh - Tourism Minister

Tourism minister Lalnghinglova Hmar chuan, tourism lama hmasawn turin Mizoram thilte Mizote'n an ngaihlut a, social media hrang hrangah theh lar thiam a pawimawh thu leh, mikhual chunga ṭhat chhuah chu pi pute aṭanga Mizote nunphung a nih thu a sawi.

Tourism department-in nimina IPR Lianchhiari Rûna 'Tourism Stakeholder Consultative Meeting' an buatsaih a hmanpuinaah Lalnghinglova Hmar chuan, "Relin Sairang a rawn thleng a, rin phak bakin tourist an tam a, department lam pawh kan lo inbuatsaih ṭha hman meuh lo. Mizote hi pi pute aṭanga mikhual chunga ṭhat chhuah ṭhin kan ni a, chu chu tunah hian a takin kan kalpui ang a, kan commercialize dawn a ni," a ti.

Lalnghinglova Hmar chuan, Mizoram chu tun hma chuan India rama tlawh man to ber, thlawhtheihna chuan man leh zin veivahna man to ber pawl a nih thu sawiin, "Tunah chuan rêl a rawn luh thûk tawh avangin tourist kan ngah chho mek. Tourism kaltlanga sum kan hai luh theih nan khualzin kan mamawh a, khualzinte'n kan hmun neihte leh kan festival-te an rawn chhim châk theih nan keimahni vek hian kan ngaihhlut a, kan theh lar thiam a ngai," a ti a; social media hman ṭangkai thiam a pawimawh thu a sawi.

Tourism Minister chuan, India ram state dang bakah Mizoram ṭhenawm hnaiahte an state sum thawh chhuah (GSDP)-ah tourism-in a thawh hlâwk thu sawiin, "Sairang thleng rel lo lut vanga Mizoram pan man a tlawm ta leh a awlsam tak avanga khualzin tam zel tur hre reng chunga kan inpuahchah ṭhat a pawimawh," a ti a; adventure tourism, eco tourism leh agro based tourism-te uar chhoh zel an tum thu leh kum thar aṭangin tourism calendar siam an tum thu a sawi bawk.

Tourism Stakeholder Consultative Meeting-ah hian Sairang thleng rel lo lut vanga khualzin pung zelah tourism kaihhnawiha eizawng leh a kaihhnawih sorkar department hotu te, ACBOA, tour operator, hotel, restaurant, homestay, Sairang khawtlang hruaitute leh MJA aiawhte an tel. Khualzinte ṭha taka dawnsawn dan tur te, harsatna leh hmachhawpte sawiho a ni a, zawhna leh chhanna hun hman a ni.