Mizoramah chi bil hmalakna a awm tawh loh nan YMA-in hmalak an rêl

YMA Inkhawmpui Lian vawi 75-na chu October 21, Thawhlehni zan khan Sakawrdai khelmuala pandal Chengkawlawn Rûnah ṭan a ni a; nimin khan rorel niin, Mizoramah chi bil hmalakna a awm tawh loh nan hmalak an rêl bakah, kumpuan atan 'Ruihhlo do' an thlang.

YMA Inkhawmpui Lian ṭan zanah hian palai lawmna hun hman a ni a, a thlengtu Sakawrdai bialtu MLA Lalchhandama Ralte-in hmanpuiin thu a sawi. Lawmman chi hrang hrang sem a ni a, YMA leh Central YMA dinhmun tlangpui tarlan a ni.

Nimin khan pandal-ah CYMA president Lalhmachhuana kaih­hruaiin rorel inkhawm neih a ni a, rorel palai 1,506 an tel. "Zo hnahthlak chi peng hrang hrang Mizorama chengte zingah chi bil hmalakna a awm tawh loh nan CYMA-in hma la rawh se," tiin an rel.

Sorkar khawih agenda pathum pawmin, Inner Line Permit tun aia khauh leh awmze neia kalpui a nih theih nan sorkarah thlen an rêl a; tui hnâr humhalh dan siam a nih theih nan sorkarah hmalak an rêl. Mizorama kawngpui chhia vanga mipuite'n harsatna an tâwk nasa lutuk ṭhin a ziaawm theih nan 'Mizoram sorkarin tun aia chak zawkin hma la rawh se,' an ti bawk.

Kum 2025-2027 chhunga kumpuan atan 'Ruihhlo do' thlangin, kum 2027-a Inkhawmpui Lian thleng turin Vairengte an thlang a; kum 2025-26 budget atan Rs 2,11,49,935 an pawm a, kum hmasa aiin Rs 8,17,955-in a tam zawk.

CYMA general secre-tary Prof. Malsawmliana tarlan danin, YMA-ah hian member 5,07,267 awm mekin, mipa 2,95,905 leh hmeichhia 2,11,362 an ni a; branch 827, group 49 leh sub-headquarters pakua - Lunglei, Champhai, Kolasib, Mamit, Serchhip, Saitual, Khawzawl, Hnahthial leh Siaha sub-hqrs-te a awm.

Mizoram páwn (India ram chhung)-a state panga - Assam, Meghalaya, Manipur, Tripura leh Nagaland-ah YMA group leh branch a awm a; India ram páwn Bangladesh-ah branch pakhat, Sajek Branch a awm bawk.

YMA Inkhawmpui Lianah hian nimin zing khan CYMA President-in Inkhawmpui Lian Exhibition a hawng a; chhunah rorel palai ni lote tan Sakawrdai Community Hall-ah variety programme hman a ni. Zanah vantlang inkhawm hman a ni a, chief minister Lalduhoma'n a hmanpui.

Vawiinah pandal-ah kum 2025-2027 chhunga CYMA office bearer thlan a ni dawn a, office bearer paruk atan nominee mi 12 an awm. Inthlan hlânin inthlannaa tel ve lo turte tan Sakawrdai Community Hall-ah variety programme hman a ni ang a, zanah palai thlahna inkhawm hman a ni ang.

Inkhawmpuiah hian October 21, Thawhlehni zan dar 11:45 thleng khan palai 3,455 chhinchhiah a ni.